भूत भनेर भाग्दा इनारभित्र भेटिए ५ दिनदेखि बेपत्ता यी व्यक्ति

बैशाख १७- पाँच दिनदेखि बेपत्ता एक व्यक्ति ३० फिट गहिरो पानी सुकेको इनारमा भेटिएका छन् । हरिवन नगरपालिका–५ निवासी ५५ वर्षीय सानुमान जिम्बालाई घुर्कौलीस्थित सुकेको इनारभित्र आज फेला पारिएको हो । १२ वैशाखदेखि हराइरहेका उनलाई ३० फिट गहिरो इनारबाट नेपाली सेना रणशेर गण पाँचकुमारीका जमदार हिमबहादुर तिवारी नेतृत्वको सैनिक टोलीले सकुशल निकालेको हो ।

बेपत्ता भएपछि उनको खोजी भइरहेको थियो । तर स्थानीय १३ वर्षीय बालक विवश पाख्रिनले इनारमा जिम्बालाई देखेपछि भुत भुत भन्दै गाउँतिर भागेका थिए । त्यसपछि स्थानीयले उनी भएको थाहा पाएका हुन् । राजधानी दैनिकमा खबर छ ।