हितकाजी सभापति बने, युवराजले फेरि बोलाए महाधिवेशन! जनसम्पर्क समिति यूकेमा नयाँ ट्विस्ट

लण्डन । नेपाली कांग्रेसको बेलायतस्थित भ्रातृ संस्था नेपाली जनसम्पर्क समिति बेलायतको नेतृत्व विवाद फेरि नयाँ मोडमा पुगेको छ। एक समूहले हितकाजी गुरुङलाई सभापतिमा सर्वसम्मत चयन गरेको घोषणा गरेपछि अर्को समूहका सभापति युवराज गुरुङले आगामी नोभेम्बर २१ तारिख शनिबार छैटौँ महाधिवेशन गर्ने घोषणा गरेका छन्।

युवराज गुरुङका अनुसार फेल्थाममा आयोजना हुने छैटौँ महाधिवेशनको तयारी तीव्र पारिएको छ। महाधिवेशनमा नेपाली कांग्रेसका नेता डा. प्रकाशशरण महत प्रमुख वक्ताका रूपमा सहभागी हुने कार्यक्रम रहेको उनले बताएका छन्।

सभापति गुरुङका अनुसार महाधिवेशनलाई व्यवस्थित र प्रभावकारी बनाउन प्रतिनिधि व्यवस्थापन, संगठन विस्तार तथा अधिवेशनसँग सम्बन्धित अन्य प्रक्रियालाई प्राथमिकतामा राखेर तयारी अघि बढाइएको छ।

तर, युवराज गुरुङ पक्षले महाधिवेशनको मिति घोषणा गरेको समय भने जनसम्पर्क समिति यूकेको नेतृत्वलाई लिएर अर्को समूहले हितकाजी गुरुङलाई सभापतिमा चयन गरिसकेको दाबी गरेको अवस्थासँग जुधेको छ। यसअघि भएको सहमतिअनुसार हितकाजी गुरुङ सभापतिमा सर्वसम्मत चयन भएको र उनको कार्यकाल चार वर्ष रहने बताइएको थियो।

त्यसैगरी, सोही समूहले शेरबहादुर सुनार, महेश दाहाल, युवराज सिंह, विश्वआदर्श पण्डित, लोक गुरुङ, कोपिला सुब्बा, रितेश पाण्डे, प्रताप खरेल, कमला तामाङ र राजेन्द्र सुवेदीलाई महाधिवेशन प्रतिनिधिका रूपमा टुंगो लगाइएको जनाएको थियो। महासमिति सदस्यका रूपमा पनि केही नाम प्रस्ताव गरिएको थियो।

यसरी एउटै संगठनको नेतृत्वका विषयमा एकातर्फ हितकाजी गुरुङ सभापति चयन भएको घोषणा र अर्कोतर्फ युवराज गुरुङ नेतृत्वको छैटौँ महाधिवेशनको घोषणा भएपछि बेलायतस्थित कांग्रेस वृत्तमा नयाँ बहस सुरु भएको छ।

देउवा पक्षप्रति युवराजको समर्थन

यसैबीच, युवराज गुरुङले काठमाडौंमा जारी नेपाली कांग्रेसको १५औँ महाधिवेशनको प्रक्रियाप्रति असहमति जनाउँदै आएका छन्। उनले पार्टीभित्र देखिएको विवाद तथा विशेषगरी कांग्रेस सभापति शेरबहादुर देउवामाथि भएको भनिएको अन्यायका विषयमा आवाज उठाउँदै आएको बताएका छन्।

गुरुङले देउवा पक्षप्रति आफ्नो समर्थन स्पष्ट गर्दै बेलायतमा हुने जनसम्पर्क समितिको महाधिवेशनमार्फत पार्टीभित्रको पछिल्लो राजनीतिक अवस्थाबारे आफ्नो धारणा पनि सार्वजनिक गर्ने तयारी गरेको बताइएको छ।

उनले पार्टीको आन्तरिक लोकतन्त्र, विधि र संगठनको भूमिकालाई बलियो बनाउनुपर्नेमा जोड दिँदै आएका छन्।

अब प्रश्न—कुन प्रक्रियाले पाउँछ मान्यता?

हितकाजी गुरुङलाई सभापति चयन गरिएको घोषणा र युवराज गुरुङले छुट्टै छैटौँ महाधिवेशन बोलाएको अवस्थाले अब जनसम्पर्क समिति बेलायतको आधिकारिक नेतृत्व र अधिवेशन प्रक्रियाबारे प्रश्न उठाएको छ।

विशेषगरी एउटै संगठनको नेतृत्वका लागि दुई पक्षबाट फरक–फरक प्रक्रिया अघि बढेपछि आगामी नोभेम्बर २१ को अधिवेशनले कुन राजनीतिक र संगठनात्मक दिशा लिन्छ भन्ने विषय चासोको बनेको छ।

बेलायतस्थित नेपाली कांग्रेसका नेता तथा कार्यकर्ताका लागि यो विवाद केवल नेतृत्व चयनमा सीमित नभई संगठनको विधि, अधिवेशनको प्रक्रिया र पार्टी केन्द्रसँगको सम्बन्धसँग समेत जोडिएको विषय बनेको छ।

युवराज पक्षले भने आफ्नो अधिवेशन निर्धारित मितिमै सम्पन्न गर्ने तयारी अघि बढाएको जनाएको छ। उता हितकाजी पक्षबाट सभापति चयन भइसकेको दाबी गरिएको छ।

अब दुवै पक्षबीच समन्वय, सहमति वा छुट्टाछुट्टै संगठनात्मक प्रक्रियामध्ये कुन बाटो अघि बढ्छ, त्यसले नेपाली जनसम्पर्क समिति बेलायतको आगामी राजनीतिक स्वरूप निर्धारण गर्ने देखिन्छ।