कांग्रेसले तीन दशकपछि जित्यो भैरहवाको मेयर

भैरहवा : रुपन्देहीको सिद्धार्थनगर नगरपालिका (भैरहवा) मा तीन दशक पछि नेपाली कांग्रेसले आफ्नो विरासत फर्काएको छ।

कांग्रेसले नगरमा आफ्नो विरासत फर्काउनका लागि राजनीतिक क्षेत्रमा कुनै दाग नलागेको प्रमुख (मेयर) पदमा ‘क्लिन फेस’ इस्तियाक अहमद खानलाई चुनावी मैदानमा उतारेको थियो।

३० वर्ष अघि ०४९ सालको स्थानीय निर्वाचनमा कांग्रेसबाट मेयरमा बलराम गौतम निर्वाचित भएका थिए। त्यसयताको निर्वाचनमा कांग्रेसले हार व्यहोर्दै आएको थियो। ०७९ को स्थानीय निर्वाचनमा कांग्रेसका उम्मेदवार खानले ९ हजार १३४ मत प्राप्त गरी निर्वाचित भएको रुपन्देहीको मुख्य निर्वाचन अधिकृत धनसिंह महराले जानकारी दिए। उनले आफ्नो निकटतम प्रतिस्पर्धी राप्रपाका मेयर उम्मेदवार सागर प्रताप राणालाई ९९७ मतान्तरले पराजित गर्दै विजयी भएका हुन्।

राणाले ८ हजार १३७ मत प्राप्त गरे। त्यस्तै ०७४ को निर्वाचनमा दुई दशकपछि मेयर र उपमेयर दुवै पदमा विजयी भई नगरमा आफ्नो झण्डा गाड्न सफल भएको एमाले यस पटकको निर्वाचनमा तेस्रो स्थानमा खुम्चिएको छ। एमालेका मेयर पदका उम्मेदवार डा. रामप्रसाद बस्यालले ७ हजार ३०५ मत प्राप्त गरेको मुख्य निर्वाचन अधिकृत महराले बताए।

एमालले नगरमा मेयर पद गुमाए पनि उपमेयर पद भने जोगाउन सफल भएको छ। उपमेयरमा एमालेको उम्मेदवार उमा अधिकारीले ८ हजार ८१३ मत ल्याएर विजयी भएकी छन्। निकटतम प्रतिद्वन्द्वी राप्रपाको उम्मेदवार विनिता गुप्ताले ६ हजार ५४४ मत प्राप्त गरिन्।