काठमाडौँ– नेपाली कांग्रेसले सर्वसम्मतिमै महाधिवेशनको नयाँ कार्यतालिकाको टुङ्गो लगाउने जनाएको छ ।
शनिबार पार्टी सभापति शेरबहादुर देउवा निवास बुढानीलकण्ठमा बसेको केन्द्रीय कार्यसमिति बैठकमा नयाँ कार्यतालिकाका विषयमा केन्द्रीय सदस्यहरुले धारणा राखेको र धारणा राख्ने क्रम सकिएपछि परिमार्जित कार्यतालिका पेश हुने तथा सर्वसम्मतले पारित हुने प्रवक्ता विश्व प्रकाश शर्माले जानकारी दिए ।
१४ औं महाधिवेशनको नयाँ कार्यतालिकाको विषयमा सदस्यहरुले आफ्नो धारणा राखिरहेको उनले बताए । त्यस्तै महाधिवेशन निर्वाचन निर्देशिकाको विषयमा पनि धारणा राख्ने क्रम जारी रहेको र यसलाई पनि आवश्यक परिमार्जन गरिने शर्माले बताए ।
बैठकमा सदस्यहरुले अफगानस्तानको घटनाक्रमले नेपाली कामदारलाई पर्नसक्ने असर, बेलायती भूतपूर्व गौर्खा सैनिकको विषय, ईपीएस परीक्षा पास गरेर कोरिया जान नपाएका नेपाली युवालगायतका विषयमा पनि प्रधानमन्त्री समेत रहेका सभापति देउवाको ध्यानाकर्षण गराइएको प्रवक्ता शर्माले जानकारी दिए ।
उनले आमन्त्रित केन्द्रीय सदस्यहरुले राजीनामा दिँदै गर्दा उठाएका विषयलाई पनि सम्बोधन गरिने बताए ।
भदौ १६ देखि १९ गतेसम्मका लागि निर्धारित १४ औँ महाधिवेशन सार्ने सम्बन्धमा काँग्रेसभित्र मतभेद छ । संस्थापन पक्षबाट आउँदो मंसिरभित्र महाधिवेशन गर्ने गरी धारणा आइरहेको छ भने संस्थापन इत्तर समूहले असोजमै महाधिवेशन गर्नुपर्नेमा जोड दिएको छ ।
