0
Shares
सप्तरी– जिल्ला प्रशासन कार्यालय सप्तरीले राजविराज नगरपालिका क्षेत्रमा कर्फ्यु आदेश जारी गरेको छ ।
प्रशासनले आज बिहान एक सूचना जारी गर्दै शान्ति–सुरक्षा कायम राख्न राजविराज नगरपालिका क्षेत्रमा बिहान ८ बजेदेखि अर्को आदेश नभएसम्मका लागि कर्फ्यु जारी गरेको हो ।
प्रशासनका अनुसार नगरपालिका क्षेत्रको पूर्वमा खाँडो खोला, पश्चिममा हुलाकी राजमार्गअन्तर्गत जमुनी थलही, उत्तरमा रूपनी रोडअन्तर्गत बसबिट्टी र दक्षिणमा कोशी पश्चिमी मूल नहरसम्मको क्षेत्रमा कर्फ्यु आदेश लागू गरिएको छ।
प्रशासनले पछिल्लो सुरक्षा अवस्थाको विश्लेषण गर्दै आन्दोलन वा अवाञ्छित गतिविधिका कारण शान्ति–सुरक्षामा असर पर्न सक्ने देखिएकाले जिल्ला सुरक्षा समितिको निर्णयअनुसार कर्फ्यु आदेश जारी गरिएको सूचनामा उल्लेख गरेको छ।
प्रशासन कार्यालयले यस आदेशको बर्खिलाप हुनेगरी कुनै गतिविधि गरे, गराएको पाइएमा प्रचलित कानुन बमोजित कारबाही गरिने जनाएको छ ।
