सेयर विवादमा गृहमन्त्री गुरुङको स्पष्टीकरण: ‘हल्ला होइन, प्रमाणले बोल्छ’

काठमाडौं।गृहमन्त्री सुधन गुरुङ ले आफ्नो नाम जोडिएको सेयरसम्बन्धी विवादबारे विस्तृत स्पष्टीकरण दिएका छन्। सामाजिक सञ्जालमार्फत सार्वजनिक प्रतिक्रिया दिँदै उनले आरोपहरू तथ्यभन्दा बढी अनुमानमा आधारित रहेको दाबी गरेका छन्।

‘२५ लाख लुकाएको होइन, वर्गीकरणको विषय’
गुरुङले आफूले २ करोडभन्दा बढीको सेयर लगानी सम्पत्ति विवरणमै खुलाइसकेको उल्लेख गर्दै २५ लाख रुपैयाँ बराबरको लगानी लुकाइएको भन्ने आरोप अस्वीकार गरेका छन्।
उनका अनुसार स्टार माइक्रो इन्स्योरेन्स र लिबर्टी माइक्रोमा गरिएको लगानी छुट्टै नदेखिएको भए पनि त्यो एउटै समग्र लगानीअन्तर्गत समेटिएको हो।

‘सेयर लगानी अपराध होइन’
मन्त्री बन्नुअघि सेयर खरिद गरेको विषयमा उठेको प्रश्नलाई उनले स्वाभाविक आर्थिक गतिविधिका रूपमा व्याख्या गरेका छन्।
“सेयरमा लगानी गर्नु अपराध होइन,” उनले स्पष्ट पारेका छन्।

उनका अनुसार सबै कारोबार बैंकिङ च्यानलमार्फत भएको छ र त्यसको अभिलेख उपलब्ध छ।

ऋणबाट आएको स्रोत, कागजले पुष्टि गर्छ
लगानीको स्रोतबारे उनले २०८०–०५–२९ मा गरिएको तमसुकअनुसार ऋणमार्फत रकम जुटाइएको र बैंकिङ प्रणालीमार्फत आएको बताएका छन्।
“पैसा कहाँबाट आयो भन्ने कुरा अनुमानको होइन, कागज र बैंक रेकर्डले पुष्टि गर्ने विषय हो,” उनले भने।

‘साझेदारी’ आरोपप्रति प्रतिवाद
विवादित व्यक्तिसँग साझेदारी गरेको आरोपलाई उनले खारेज गर्दै एउटै कम्पनीमा हजारौँ सेयरधनी हुने भएकाले सेयर खरिद गर्नु सबैसँग साझेदारी गर्नु नभएको तर्क दिएका छन्।

कन्फ्लिक्ट अफ इन्टरेस्ट: जिम्मेवारी अन्य निकायको
गुरुङले सम्भावित ‘कन्फ्लिक्ट अफ इन्टरेस्ट’ सम्बन्धी छानबिन गृह मन्त्रालयको दायित्व नभई अर्थ मन्त्रालयअन्तर्गतको निकायले हेर्ने विषय भएको स्पष्ट पारेका छन्।
आफूले छानबिन प्रक्रियामा कुनै हस्तक्षेप नगरेको पनि उनले दाबी गरेका छन्।

ढिलो प्रतिक्रिया किन?
कानुनी रूपमा संवेदनशील विषय भएकाले तुरुन्त प्रतिक्रिया नदिएको उल्लेख गर्दै उनले “हल्ला छिटो फैलिन्छ, तर सत्य प्रमाणसहित मात्र आउँछ” भनेका छन्।