0
Shares
न्यूयोर्क।
संयुक्त राज्य अमेरिका र इरान बीच दुई हप्ते युद्धविराम घोषणा भएपछि अन्तर्राष्ट्रिय बजारमा कच्चा तेलको मूल्यमा उल्लेख्य गिरावट आएको छ। पाँच हप्तादेखि जारी तनावका कारण उकालो लागेको तेल मूल्य बुधबार करिब १५ प्रतिशतसम्म घटेको हो।
ब्रेन्ट क्रुड र डब्लुटीआई दुवैको मूल्यमा आएको गिरावटसँगै लगानीकर्ताहरू उत्साहित देखिएका छन्। ऊर्जा बजारमा आएको यो सकारात्मक संकेतले विश्वव्यापी महँगी घट्ने अपेक्षा बढाएको अन्तर्राष्ट्रिय सञ्चारमाध्यमहरूले जनाएका छन्।
सेयर बजारमा मिश्रित प्रभाव
अमेरिकी सेयर बजारमा प्रविधि क्षेत्रका कम्पनीहरू—NVIDIA, Tesla र Intel—का सेयर मूल्यमा वृद्धि देखिएको छ।
तर तेल मूल्य घटेसँगै ऊर्जा कम्पनीहरूको सेयर करिब ३ प्रतिशतले घटेको छ।
होर्मुज जलडमरू खुल्ने सहमति
अमेरिकी राष्ट्रपति डोनाल्ड ट्रम्प ले इरानमाथिको आक्रमण स्थगित गर्ने तथा होर्मुज जलडमरू पुनः सञ्चालन गर्ने सहमति भएपछि बजारमा सुधार आएको हो।
विश्वको करिब २० प्रतिशत तेल आपूर्ति हुने यो जलमार्ग बन्द हुँदा ऊर्जा बजारमा ठूलो संकट सिर्जना भएको थियो। अब पुनः सञ्चालनसँगै आपूर्ति सहज हुने विश्वास बढेको छ।
मध्यस्थता र आगामी वार्ता
पाकिस्तान को मध्यस्थतामा भएको युद्धविरामले खाडी क्षेत्रबाट हुने तेल र ग्यास आपूर्तिमा अवरोध हट्ने अपेक्षा गरिएको छ।
यसैबीच, ओमान मा शुक्रबारदेखि हुने वार्ताले स्थायी समाधानतर्फ मार्ग प्रशस्त गर्ने अपेक्षा गरिएको छ।
