‘२८ अर्ब ऋण किन?’—हर्क साम्पाङको सरकारलाई प्रश्न

काठमाडौं। श्रम संस्कृति पार्टीका अध्यक्ष हर्क साम्पाङ ले सरकारले लिने निर्णय गरेको २८ अर्ब रुपैयाँ सहुलियत ऋणबारे स्पष्ट जवाफ दिन कडा माग गरेका छन्। सामाजिक सञ्जालमार्फत सार्वजनिक सन्देश जारी गर्दै उनले सरकारको निर्णय प्रक्रियामाथि नै प्रश्न उठाएका हुन्।

“बहुमत ल्यायौँ भन्दैमा मन्त्रीहरू मिलेर गोप्य रूपमा यस्तो ठूलो आर्थिक निर्णय गर्न मिल्दैन,” साम्पाङले भने, “ऋण किन लिइँदैछ, कहाँ खर्च हुन्छ—सबै कुरा सदनमा खुलाएर भन्नुपर्छ।”

उनको यो अभिव्यक्तिले सरकारको आर्थिक पारदर्शितामाथि गम्भीर प्रश्न खडा गरेको छ। मन्त्रिपरिषद्को आइतबारको बैठकले एशियाली विकास बैंक र विश्व बैंक बाट २८ अर्ब रुपैयाँ सहुलियत ऋण लिने निर्णय गरेको थियो। तर, उक्त ऋणको प्रयोजन र कार्यान्वयनबारे विस्तृत विवरण सार्वजनिक नभएकाले आलोचना बढ्न थालेको छ।

गृहमन्त्रीमाथि पनि प्रश्न
साम्पाङले गृहमन्त्री सुधन गुरुङ सँग सम्बन्धित जग्गा प्रकरणलाई पनि उठाएका छन्। पोखरामा २० रोपनी जग्गा रहेको विवरण सार्वजनिक भइसकेकाले त्यसबारे सत्यतथ्य स्पष्ट पार्न उनले माग गरेका छन्।

सरकारको शैलीमाथि कडा आलोचना
साम्पाङको भनाइले सरकारको निर्णय प्रक्रिया ‘केन्द्रित र अपारदर्शी’ हुँदै गएको संकेत गर्छ। ठूलो परिमाणको विदेशी ऋण लिँदा संसद् र जनतालाई जानकारी नदिइनु लोकतान्त्रिक अभ्यासविपरीत भएको उनको आरोप छ।