निर्मला पन्तको हत्यारा तुरुन्तै खोज्न प्रधानमन्त्री देउवाको गृहमन्त्रीलाई निर्देशन

काठमाडौं – कञ्चनपुरकी बालिका निर्मला पन्तका हत्यारा पत्ता लगाउन प्रधानमन्त्री शेरबहादुर देउवाले सक्रियता देखाएका छन् ।

बालिका पन्तको बलात्कारपछि हत्या भएको ३ वर्ष पूरा भएको दिन आज आईतवार प्रधानमन्त्री देउवाले गृहमन्त्री बालकृष्ण खाँण र नेपाल प्रहरीका प्रमुखलाई बालुवाटारमा बोलाएर ब्रिफिङ लिएका छन् ।

प्रधानमन्त्री देउवाले चाँडोभन्दा चाँडो दोषी पत्ता लगाएर कारबाही गर्न निर्देशन दिएका छन् ।

देउवाले ट्विटरमा लेखेका छन्, ‘निर्मला पन्तको हत्या भएको ३ वर्ष पुगेको दिन आज मैले गृहमन्त्री र प्रहरी प्रमुखलाई बोलाएर अहिलेसम्म भएको अनुसन्धानबारे जानकारी लिएको छु । चाँडोभन्दा चाँडो दोषी पत्ता लगाएर कारबाही गर्न निर्देशन पनि दिएको छु ।’

बहुचर्चित निर्मला हत्याकाण्ड अनुसन्धान लामो समयदेखि अनिर्णित रहेको छ । देशभर आन्दोलन हुँदा समेत दोषी पत्ता लाग्न सकेको छैन ।