0
Shares
सिड्नी, अस्ट्रेलिया। नेपालबाट अस्ट्रेलिया पुगेर प्रहरी सेवामा आबद्ध भएका विकास भारतीले असाधारण साहस र वीरता प्रदर्शन गरेको भन्दै अस्ट्रेलियाको प्रतिष्ठित राष्ट्रिय प्रहरी वीरता पुरस्कार (National Police Bravery Award) प्राप्त गरेका छन्।
न्यु साउथ वेल्स प्रहरीअन्तर्गत बर्वुड प्रहरी क्षेत्रीय कमान्डमा कार्यरत वरिष्ठ प्रहरी अधिकृत भारतीलाई बुधबार, २८ अक्टोबर २०२६ मा क्यानबेरामा आयोजित समारोहमा अस्ट्रेलियाका प्रधानमन्त्री एन्थोनी अल्बानीजले उक्त पुरस्कार प्रदान गरेका हुन्। समारोहमा सांसद टोनी बर्कको पनि उपस्थिति थियो।
घटना गत ५ अक्टोबर २०२५ को हो। सिड्नीको क्रोइडन पार्कस्थित जर्जेस रिभर रोडमा गोली चलेको सूचना प्राप्त भएपछि प्रहरी टोली घटनास्थल पुगेको थियो। घटनास्थलमा सबैभन्दा पहिले पुग्ने प्रहरी अधिकृतमध्ये भारती पनि एक थिए। उनीसँग एक कनिष्ठ प्रशिक्षार्थी प्रहरी अधिकृतसमेत थिए।
घटनास्थलमा गोली चलिरहेको अवस्थामा पनि भारतीले असाधारण साहस प्रदर्शन गर्दै पहिले आफ्ना कनिष्ठ सहकर्मीलाई सुरक्षित स्थानमा जान निर्देशन दिए। त्यसपछि उनले सवारीसाधनभित्र फसेका एक घाइते सर्वसाधारणलाई जीवनरक्षाका लागि सहयोग गर्ने प्रयास गरे।
खतरा कायमै रहे पनि उनले घाइतेलाई सहयोग गर्न जारी राखे। पछि सुरक्षाका लागि ओत लाग्न निर्देशन पाएपछि मात्रै उनी त्यसतर्फ लागेका थिए। उनको उक्त कार्यले साहस, नेतृत्व क्षमता र मानव जीवनको रक्षाप्रतिको प्रतिबद्धता प्रदर्शन गरेको बर्वुड प्रहरी क्षेत्रीय कमान्डले जनाएको छ।
सन् २०१५ मा नेपालबाट अस्ट्रेलिया पुगेका भारतीले पुरस्कार ग्रहण गर्ने क्रममा आफ्नो यात्रा स्मरण गर्दै आप्रवासीका रूपमा आफू अस्ट्रेलियामा अवसर, सुरक्षा र परिवारका लागि राम्रो भविष्यको खोजीमा आएको बताएका थिए।
उनले एक दिन न्यु साउथ वेल्सको समुदायको सेवा गर्ने प्रहरी अधिकृतका रूपमा काम गर्न पाउने अवसर प्राप्त होला भन्ने आफूले कल्पना नगरेको उल्लेख गरे।
भारतीले घटनाका क्रममा साथ दिएका सहकर्मीहरूलाई पनि सम्झँदै प्रहरी सेवा कुनै एक व्यक्तिको प्रयासबाट मात्र सम्भव नहुने बताए।
बर्वुड प्रहरी क्षेत्रीय कमान्डले भारतीको साहस, मानवीय संवेदना र नेतृत्व क्षमताको प्रशंसा गर्दै उनको उपलब्धिप्रति गर्व व्यक्त गरेको छ।
क्रोइडन पार्कको घटनास्थलमा देखाएको साहसदेखि राष्ट्रिय स्तरको सम्मानसम्मको उनको यात्रा नेपाली मूलका समुदायका लागि प्रेरणादायी उपलब्धिका रूपमा हेरिएको छ।
कर्तव्य निर्वाहका क्रममा जोखिम मोलेर घाइतेको जीवन बचाउन गरेको प्रयासको कदरस्वरूप राष्ट्रिय प्रहरी वीरता पुरस्कार प्राप्त गरेका भारतीलाई विभिन्न क्षेत्रबाट बधाई तथा शुभकामना व्यक्त गरिएको छ।
