कोरोना दोस्रो विश्वयुद्धपछिको सबैभन्दा ठूलो चुनौतीः चान्सलर मर्केल

बर्लिन। जर्मन चान्सलर एन्जेला मर्केलले कोरोना विरूद्धको लडाई दोश्रो विश्वयुद्ध पछिको सबैभन्दा ठूलो चुनौती भएको बताएकी छिन् । टेलिभिजन मार्फत सम्बोधन गर्दै मर्केलले यो लडाईंमा सबै नागरिकलाई साथ दिन हात अपिल गरेकी छिन् ।

मर्केल सन् २००५ देखि जर्मनीको चान्सलर हुन् । यी १५ बर्षमा, मर्केलले सँधै नयाँ वर्षको अवसरमा मात्र टेलिभिजन मार्फत देशबासीलाई सम्बोधन गर्ने गरेकी थिइन् । चान्सलर मर्केलले आफ्नो करिअरमा पहिलो पटक आपतकालको कारणले देशलाई सम्बोधन गरेकी हुन् । चीनपछि सबैभन्दा बढी कोरोनाको प्रभाव इटाली, इरान, स्पेन र जर्मनीमा देखिएको छ । कोरोनाको बढ्दो असरलाई मध्यनजर गर्दै युरोपका तीन देशहरु इटाली, स्पेन र फ्रान्सले पुरै लकडाउनको घोषणा गरेका छन भने अष्ट्रिया, नर्वे, स्वीजरल्याण्ड, जर्मनी लगायतका देशले आशिंक क्षेत्र लकडाउन गरेका छन् ।

मर्केलको टेलिभिजन सम्बोधन हुने चर्चासँगै जर्मनीमा पनि आपतकाल घोषणा हुने आशंका गरिएको थियो तर उनले सो घोषणा भने गरिनन् । देश चलाउनु पर्ने भन्दै उनले आर्थिक पाटोलाई जीवितै राख्न सकभर कामहरु जारी राख्नुपर्ने तर्क गरेकी छिन् । तर सबै कुरा जसले मानिसलाई हानी पु‍र्याउँछ, त्यसलाई भने कम गर्नुपर्नेमा उनको जोड थियो । जति सकिन्छ सार्वजनिक घुलमिल घटाउन आग्रह गर्दै मर्केलले होशियारीका साथ अघि बढ्न अपिल गरेकी छिन् ।

अवस्था एकदम गम्भीर भएको र आम जनताले पनि यसलाई गम्भीरताका साथ लिनुपर्ने भन्दै उनले सरकारले लगाएको हरेक प्रकारको प्रतिबन्धको होसियारीपूर्वक अनुसरण गर्न अपिल गरिन् । उनले भनेकी छिन्, ‘सार्वजनिक जीवनमा प्रतिबन्ध लगाइएको छ, यो जर्मनीमा कहिल्यै भएको थिएन । प्रजातन्त्रमा त्यस्तो प्रतिबन्ध केवल आपतकालमा मात्र लागू गर्न सकिन्छ र त्यो पनि अस्थायी रूपमा ।’

६५ बर्ष भन्दा माथिका ब्यक्तिमा कोरोनाको उच्च जोखिम हुने भएकाले वृद्धवृद्धा र बालबालिकाहरु एकअर्काबीच टाढा रहन विशेषज्ञहरुले गरेको आग्रह पालना गर्न अपिल गरेकी छन् । मानिसहरूबीच सम्पर्क स्थापित गर्न बरु स्काइप, टेलिफोन, इमेल वा पत्राचार गर्न सल्लाह दिएकी छन् ।

जर्मनीमा मानिसहरूले कोरोनाको बढ्दो अवस्थाको बीचमा सुपरमार्केटबाट धेरै मात्रामा सामानहरू खरिद गरिरहेका छन् । लकडाउन हुने डरले नागरिकहरुले खानेकुरा भण्डार गरिरहेका छन् । मर्केलले मानिसहरूलाई अफवाहमा विश्वास नगर्न अपिल गर्दै जस्तोसुकै अवस्थामा पनि खाद्य वस्तुहरूको आपूर्ति जारी हुने सुनिश्चितता ब्यक्त गरिन् । मर्केल भन्छिन्, ‘सबैलाई विश्वास दिलाउँछु कि सबै सामान समयमा उपलब्ध हुन्छन् । यदि खाद्यान्न र्याकहरु खाली छन् भने, भोलिपल्टै तिनीहरू भरिनेछन् । ’

आफ्नो सन्देशमा, मर्केलले अस्पताल र सुपरमार्केटमा काम गर्नेहरूलाई हार्दिक धन्यवाद व्यक्त गर्दै भनिन्, ‘तपाईहरू अहिले सबैभन्दा गाह्रो काम गर्दै हुनुहुन्छ र आफ्नो देशवासीको सेवा गर्दै हुनुहुन्छ ।’ मर्केलले जर्मनीको चिकित्सा प्रणाली संसारकै सब भन्दा राम्रोमध्ये एक हो भन्ने आश्वासन पनि दिइन् । यद्यपि मानिसहरूले सार्वजनिक जीवनमा प्रतिबन्धको पालना नगरेमा एक्कासी कोरोना संक्रमितको संख्या बढ्ने र अस्पतालहरूको लागि समस्या उत्पन्न हुने उनको चेतावनी थियो ।

मर्केलले कोरोनासँगको युद्धलाई ऐतिहासिक चुनौती भनिन् । ‘यो ऐतिहासिक चुनौती हो र हामी यसलाई एक भएर मात्र सामना गर्न सक्छौं, मलाई विश्वास छ कि हामी यसलाई जित्न सक्छौं । तर हाम्रा कतिपय प्रियजनहरू यस युद्धमा हामीबाट अलग हुनेछन्,’ उनले भनिन् । उनले थपिन् ‘यस समयमा स्थिति दिनप्रतिदिन परिवर्तन हुँदैछ र आउँदो हप्ताहरूमा मानिसहरूले अझ बढी चुनौतीहरूको सामना गर्न तयार हुनुपर्दछ ।’ आर्थिक रूपमा अर्को हप्ता अझ गाह्रो हुँदै जाने उनको भनाइ छ । यस कठिन समयमा सरकारले सहयोग गर्न प्रत्येक सम्भव कदमहरू चाल्ने र सरकारी कदममा आश्वस्त हुन आग्रह गरेकी छन् ।

जर्मनीमा स्कूल, डे केयर र विश्वविद्यालयहरू अप्रिल १८ सम्मको लागि बन्द छ । यसबाहेक सबै क्लब, बारहरू र थिएटरहरू पनि बन्द छन् । कन्सर्ट र फुटबल खेलहरू पनि रद्द गरिएको छ । तर रेष्टुरेन्टहरू दिनको केही समयमा खोल्न अनुमति छ । तर, टेबल डेढ मिटरको दुरीमा राख्नुपर्ने छ । सरकारी कार्यालय सहित प्राय निजी कार्यालयहरु पनि बन्द छैनन् । यद्यपि प्रायःजसो कम्पनीहरूले आफ्ना कर्मचारीहरूलाई घरबाट काम गर्न आग्रह गरिरहेका छन् । अर्थतन्त्रलाई ध्यानमा राख्दै यस्तो निर्णय लिइएको मार्केलको सन्देशबाट बुझिन्छ।

जर्मनीमा अहिलेसम्म कोरोना संक्रमणको संख्या १३ हजार पुगेको छ । ३२ व्यक्तिले आफ्नो ज्यान गुमाएका छन् । विज्ञहरूका अनुसार यदि भाइरस फैलिन रोकिएन भने आउँदो महिनाहरूमा जर्मनीमा करीव एक करोड मानिसहरू कोरोना संक्रमणको शिकार हुन सक्ने सम्भावना छ ।