दुबईमा इरानी मिसाइलको भिडियो खिचेको आरोपमा बेलायती नागरिकमाथि मुद्दा

दुबई। आकाशमा देखिएका इरानी मिसाइलहरूको भिडियो खिचेको आरोपमा एक बेलायती नागरिकमाथि साइबर–क्राइम सम्बन्धी कानुन अन्तर्गत मुद्दा दायर गरिएको छ।

संयुक्त अरब इमिरेट्स (यूएई) मा सार्वजनिक सुरक्षामा असर पार्न सक्ने सामग्री प्रकाशित वा साझा गर्न निषेध गरिएको कानुन अनुसार ती पर्यटकलाई पक्राउ गरिएको बताइएको छ। दुबईमा कानुनी सहयोग प्रदान गर्ने संस्था Detained in Dubai का अनुसार लण्डनका ती व्यक्ति सहित २० जनामाथि आरोप लगाइएको हो।

प्रहरीले उनीहरूको मोबाइल फोनमा दुबईमाथि भएको इरानी मिसाइल आक्रमणको भिडियो भेटेपछि उनीहरूलाई पक्राउ गरिएको बताइएको छ।

बेलायतको विदेश मन्त्रालयका अधिकारीहरूले ती व्यक्तिको परिवारलाई सहयोग गरिरहेको बुझिएको छ।

Detained in Dubai की प्रमुख राधा स्टर्लिङले बीबीसीसँग कुरा गर्दै औपचारिक आरोपहरू निकै अस्पष्ट भएको बताइन्।

उनका अनुसार, “मैले आरोपपत्र अध्ययन गरेँ, तर त्यसमा उनीहरूले वास्तवमा के गल्ती गरेका हुन् भन्ने स्पष्ट रूपमा उल्लेख गरिएको छैन।”

उनले यूएईमा साइबर–क्राइम कानुन अन्तर्गत मानिसहरूलाई पक्राउ गर्ने घटना बढ्दै गएको पनि बताइन्।

पक्राउ परेका बेलायती नागरिकको परिवारले हिरासतपछि उनीसँग फोनमार्फत कुरा गर्न पाएको पनि उनले जानकारी दिइन्।

यूएईमा सरकारको आलोचना गर्नु गैरकानुनी मानिन्छ। स्टर्लिङका अनुसार दुबई प्रशासनले शहर पर्यटकका लागि सुरक्षित देखाउन चाहेकाले मिसाइलको भिडियो खिच्ने व्यक्तिहरूमाथि कारबाही गरिएको हुन सक्छ।

वर्षौँदेखि दुबईले व्यापार र पर्यटनका लागि आकर्षक गन्तव्यको रूपमा आफ्नो छवि बनाउँदै आएको छ।

यसैबीच मध्यपूर्वमा जारी द्वन्द्व दोस्रो सातामा प्रवेश गरेको छ। २८ फेब्रुअरीमा अमेरिका र इजरायलले इरानमाथि व्यापक आक्रमण गरेपछि तनाव झनै बढेको हो, जसमा इरानका सर्वोच्च नेता मारिएको बताइएको छ।

त्यसपछि इरानले इजरायल तथा अमेरिकाका सहयोगी खाडी मुलुकहरूतर्फ मिसाइल आक्रमण जारी राखेको छ। यी आक्रमणहरू सैन्य लक्ष्य मात्र नभई नागरिक क्षेत्र र ऊर्जा पूर्वाधारमा समेत पुगेका छन्।

दुबईका केही प्रसिद्ध भवनहरू पनि क्षतिग्रस्त भएको बताइएको छ, जसमा पाम जुमेराह क्षेत्रमा रहेको फेयरमोन्ट द पाम होटल र बुर्ज अल अरब होटल समावेश छन्।

यस द्वन्द्वका कारण मध्यपूर्वभरका उडानहरू पनि गम्भीर रूपमा प्रभावित भएका छन्।