अमेरिकी विदेशमन्त्रीले भने- चीनलाई परास्त गर्न अमेरिका र बेलायत एक हुनुपर्छ

लन्डन- अमेरिकी विदेशमन्त्री एन्टोनी ब्लिनकेनले चीनलाई परास्त गर्नका लागि अमेरिका र बेलायत एक हुनुपर्ने बताएका छन् ।

अमेरिकासँगको व्यापार युद्ध समाधान हुनै लागेको समयमा शुरू भएको कोरोना प्रकोपले महामारीको रुप लिएसँगै चीनको पश्चिमा राष्ट्रहरुसँगको सम्बन्ध थप तनावपूर्ण बन्दै गएको हो ।कोरोना महामारीका कारण चीनबाहिरको विश्व आक्रान्त बन्दै गएको छ भने चीनमा कोरोना महामारी शून्यतर्फ झरेको छ । यससँगै चीनले दक्षिण र पूर्वी चीन सागरमा हस्तक्षेप गरिरहेको छ भने एसिया र इण्डो प्यासेफिक क्षेत्रमा पनि आफ्नो प्रभावलाई विस्तार गरिरहेको छ ।

यस्तो अवस्थामा पश्चिमा राष्ट्रहरुले चिनियाँ प्रभावलाई रोक्ने रणनीति बनाइरहेको अवस्थामा अमेरिकी विदेशमन्त्रीको यस्तो अभिव्यक्ति दिएका हुन् ।

उनले चीनले सिर्जना गरेका समस्याहरुको र चुनौतीहरुलाई सम्बोधन गर्न अमेरिकी र बेलायती विदेश नीतिको भूमिका महत्वपूर्ण हुने बताएका छन् ।

राष्ट्रपति बाइडेन प्रशासनको सन्देश लिएर बेलायत पुगेका विदेशमन्त्री ब्लिनकेनले बेलायती प्रधानमन्त्री बोरिस जोनसनसँग भेट गरेका हुन् । उक्त भेटपछि उनले अमेरिका र बेलायत मिलेर अघि बढ्नुपर्ने र द्विपक्षीय राष्ट्रिय हित र विदेश नीति निमार्णमा मिलेर अघि बढ्नुपर्ने बताएका हुन् ।

बेलायती प्रधानमन्त्रीसँगको भेटका क्रममा उनीहरुबीच तत्कालको कोभिडको सामना गर्ने, वातावरण र अन्य अन्तर्राष्ट्रिय प्राथमिकतामा प्रगति हासिल गर्ने र अमेरिका तथा बेलायतको सहयोगलाई निरन्तरता दिने विषयमासमेत सहमति भएको छ । उनीहरूले बेलायत र अमेरिकाका सहयोगलाई स्वागत गरेका छन् ।

यसअघिको क्वाड बैठकले पनि चीनविरुद्ध एक भएर अघि बढ्ने सहमति जुटेको थियो भने जी ७ को बैठकले पनि चीनको प्रभावलाई कम गर्न भूमिका खेल्ने बताएका छन् ।