2105
Shares
नेपाली काँग्रेसले कास्की प्रतिनिसभा निर्वाचन क्षेत्र नम्बर २ मा पुराना नेता खेमराज पौडेललाई टिकट दिने निर्णय गरेको छ।
बुधबार बसेको पार्टी पदाधिकारी बैठकले उनलाई टिकट दिने निर्णय गरेको काँग्रेस कास्की जिल्ला सभापति कृष्ण केसीले जानकारी दिए ।
केन्द्रीय सदस्य धनराज गुरुङले कास्की–२ को उम्मेवारमा आफ्नो दाबी नरहेको पार्टी पदाधिकारी बैठकमा जानकारी गराएपछि पौडेलले टिकटमा बाजी मारेका हुन् ।
जिल्ला सभापति केसीले भने, ‘उहाँ काँग्रेसका पुराना नेता हुनुहुन्छ । लामो समयदेखि उहाँ काँग्रेसमा निरन्तर रुपमा लागि रहनुभएको छ । उहाँको बीपी कोइरालासँग पनि राम्रो सम्पर्क र चिनजान थियो ।’
पञ्चायत र सशस्त्र युद्धका क्रममा पार्टी अप्ठ्यारोमा पेरका बेला उनले कास्कीमा संगठन निर्माणमा महत्वपूर्ण भूमिका खेलेको पनि केसीले बताए ।
केसीले पौडेलको उम्मेदवारीमा प्रश्न गर्ने ठाउँ नरहेको दाबी गर्दै अब सबै एकजुट भएर चुनाव जिताउन लागिपर्ने बताए ।
७४ वर्षीय पौडेल हाल गणेशमान सिंह प्रतिष्ठान कास्कीको संयोजकको जिम्मेवारीमा छन् ।
लामो समय पोखराको प्रौढ माध्यमिक विद्यालय (हालको नवप्रभात मावि) स्थापना गरी शिक्षण पेशामा अँगालेका उनले शिक्षण पेसाबाट अलग्एिपछि भने कास्की काँग्रेसको जिल्ला उपसभापतिको जिम्मेवारी समेत सम्हालेका थिए ।
त्यसपछि काँग्रेस विभाजन हुँदा उनी शेरबहादुर देउवा नेतृत्वको काँग्रेस प्रजातान्त्रिकका कास्की सभापति भएका थिए ।
