फोरमलाई राजपाले भन्योः ‘एकताका लागि वार्ता गर्ने भए सरकार छोड्नुस्’

काठमाडौं– राष्ट्रिय जनता पार्टी (राजपा)ले संघीय समाजवादी फोरम सरकारबाट बाहिरिएपछि मात्र एकताको लागि वार्ता गर्न सकिने सर्त तेर्स्याएको छ । राजपाले फोरमसामु सो सर्त राखेपछि दुई पार्टीबीचको एकता थप संकटमा परेको हो ।

राजपासँग पार्टी एकताका लागि वार्ता गर्न फोरमले सह–अध्यक्ष राजेन्द्र श्रेष्ठको नेतृत्वमा वार्ता समिति नै बनाएको छ । वार्ता समितिले एकताका लागि राजपालाई केही दिनअघि पत्र पठाएको थियो, तर पत्रको जवाफमा राजपाले वार्ताभन्दा पहिले सरकार छाड्न जवाफी पत्र पठाएको छ ।

राजपाले पार्टी एकताका विषयमा छलफल गर्नुभन्दा पहिले सरकार छाड्न फोरमलाई आग्रह गरेपछि पार्टी एकताको विषय थप अन्यौलग्रस्त बन्दै गएको हो ।

यता संघीय समाजवादी फोरमका अध्यक्ष उपेन्द्र यादव उपप्रधान तथा स्वास्थ्यमन्त्रीको पद सम्हालिरहेका छन् । फोरपलाई यो सर्तको कारण अब सत्ता छोडेर पार्टी मिलाउने वा सत्तामै रहने भन्ने अन्यौलपूर्ण अवस्था आएको छ । कि त उसले राजपालाई विश्वासमा लिएर पार्टी एकता गर्ने र सरकारमै सहभागी भइरहने रणनीति अपनाउन सक्छ ।

तर हालै मात्र सरकारलाई दिएको समर्थन फिर्ता ल्याएको राजपालाई फकाउन उति सहज छैन । वर्तमान सरकारमै रहेसम्म फोरमसँग वार्ता नगर्ने अडान उसले राखिसकेको छ ।

फोरम र राजपाले गत निर्वाचनमा गठबन्धन बनाएर जनतासामु गएका थिए । जसले मधेसको जनमत मधेसमै राक्न अर्थात् उनीहरुकै पक्षमा पार्न सफल पनि भए । र, अहिले फोरम र राजपाको प्रदेश नम्वर–२ मा संयुक्त सरकार पनि चलिरहेको छ ।