काठमाडौं । नेपाली गायक अनिल सिंहले अत्यधिक धुम्रपानका कारण आफ्नो स्वास्थ्यमा गम्भीर समस्या देखिएको खुलासा गरेका छन्। चिकित्सकले खुट्टासमेत गुमाउनुपर्ने अवस्था आउन सक्ने चेतावनी दिएपछि आफू स्वास्थ्य र जीवनशैलीप्रति गम्भीर बनेको उनले बताएका छन्।
हाल सांगीतिक भ्रमणका क्रममा अस्ट्रेलियामा रहेका सिंहले सार्वजनिक गरेको भिडियो सन्देशमार्फत आफ्नो स्वास्थ्य समस्या र धुम्रपानको लतसँगको संघर्षबारे जानकारी दिएका हुन्।
सिंहका अनुसार उनी विगतमा चेन स्मोकर थिए र दैनिक दुईदेखि तीन बट्टासम्म चुरोट सेवन गर्थे। त्यसको असर आफ्नो खुट्टामा देखिन थालेपछि उनले काठमाडौंमा स्वास्थ्य परीक्षण गराएका थिए। परीक्षणका क्रममा चिकित्सक डा. दिपेश शाक्यले खुट्टा गुमाउनुपर्ने जोखिम हुन सक्ने भन्दै तत्काल धुम्रपान छाड्न सुझाव दिएको सिंहले बताएका छन्।
चिकित्सकको चेतावनीपछि आफू निकै डराएको स्मरण गर्दै उनले भनेका छन्, “डाक्टरले खुट्टा काट्नुपर्ने अवस्था आउन सक्छ भनेपछि म एकदमै आत्तिएँ र नेपालबाट अस्ट्रेलियातिर भागेँ।”
नेपालमा रहँदा धुम्रपानको लत त्याग्न कठिन हुने महसुस भइरहेका बेला अस्ट्रेलिया भ्रमणको अवसर मिलेको उनले बताएका छन्।
छोटो समयमै अस्ट्रेलियाको भिसा, सांगीतिक भ्रमण पनि जारी
सिंहले अस्ट्रेलियाको भिसा प्रक्रिया छोटो समयमै पूरा भएको पनि बताएका छन्। उनका अनुसार बुधबार बायोमेट्रिक दिएपछि बिहीबार नै भिसा प्राप्त भएको थियो र त्यसै दिन उनी अस्ट्रेलिया उडेका थिए।
अस्ट्रेलिया पुगेपछि उनले सिड्नी र तास्मानियामा आयोजित ‘नेपाल फेस्टिभल’मा सांगीतिक प्रस्तुति दिइसकेका छन्। अब आगामी नोभेम्बर २८ मा एडिलेडमा हुने कार्यक्रममा सहभागी हुने तयारीमा छन्।
प्रकाश सपुत र रचना रिमालले गरे स्वास्थ्यको ख्याल
अस्ट्रेलिया भ्रमणका क्रममा साथमा रहेका गायक प्रकाश सपुत र गायिका रचना रिमालले आफ्नो स्वास्थ्यको विशेष ख्याल राखेको सिंहले बताएका छन्।
विशेषगरी प्रकाश सपुतले आफूलाई चुरोट सेवन नगर्न निरन्तर सम्झाउने र निगरानी गर्ने गरेको उनले सुनाएका छन्। सहकर्मी कलाकारहरू नेपाल फर्किएपछि आफू केही एक्लो महसुस गरिरहेको पनि उनले बताएका छन्।
सिंहका अनुसार अहिले चिकित्सकले सिफारिस गरेका औषधि नियमित सेवन गरिरहेका छन्। दैनिक दुईदेखि तीन बट्टासम्म चुरोट पिउने गरेका उनले हाल त्यसलाई घटाएर एक–दुईवटामा सीमित गरेको बताएका छन्। एडिलेडको कार्यक्रम सम्पन्न भएपछि भने धुम्रपान पूर्ण रूपमा त्याग्ने उनको प्रतिबद्धता छ।
आफ्नै अनुभव सुनाउँदै धुम्रपान त्याग्न आग्रह
आफ्नो स्वास्थ्यप्रतिको लापरबाहीबाट पाठ सिक्न आग्रह गर्दै सिंहले धुम्रपान गर्ने सबैलाई समयमै यो बानी त्याग्न अपिल गरेका छन्।
जीवनको अनिश्चिततालाई स्मरण गर्दै उनले शरीरमा सास रहुन्जेल आफ्नो संगीतमार्फत दर्शक तथा स्रोतामाझ मनोरञ्जन र खुसी बाँडिरहने इच्छा व्यक्त गरेका छन्।
सिंहको यो खुलासाले धुम्रपानको लतले व्यक्तिको स्वास्थ्य र दैनिक जीवनमा पार्न सक्ने गम्भीर असरबारे फेरि ध्यानाकर्षण गराएको छ। चिकित्सकको सल्लाहअनुसार उपचार र धुम्रपान त्याग्ने प्रतिबद्धता पूरा गर्नु उनको स्वास्थ्य यात्राका लागि महत्वपूर्ण हुने देखिन्छ।