काठमाडौं । गैरआवासीय नेपाली संघ (एनआरएनए) ले आफ्नो केन्द्रीय नेतृत्व तथा सदस्यहरूलाई नेकपा एमाले, नेपाली कांग्रेस, राष्ट्रिय स्वतन्त्र पार्टी (रास्वपा) लगायत राजनीतिक दल तथा राजनीतिक उद्देश्य भएका संस्थामा रहेको पद र सदस्यता सात दिनभित्र त्याग्न निर्देशन दिएको छ।
संघका केही पदाधिकारी तथा सदस्यहरू विभिन्न राजनीतिक दल तथा राजनीतिक उद्देश्य भएका संस्था र संगठनमा पदाधिकारी वा कार्यकारी सदस्यका रूपमा निर्वाचित, मनोनीत तथा चयन भएको भन्दै उजुरी तथा गुनासाहरू प्राप्त भएपछि संघले यस्तो निर्देशन जारी गरेको हो।
निर्देशनअनुसार नेकपा एमाले, नेपाली कांग्रेस, रास्वपालगायत राजनीतिक दल वा राजनीतिक उद्देश्य भएका संस्थामा पदाधिकारी तथा कार्यकारी सदस्यका रूपमा आबद्ध एनआरएनएका पदाधिकारी र सदस्यहरूले परिपत्र प्राप्त भएको मितिले सात दिनभित्र सम्बन्धित पद तथा सदस्यता त्याग्नुपर्नेछ।
त्यसरी पद वा सदस्यता त्याग गरेपछि त्यसको आधिकारिक प्रमाणसहित लिखित जानकारी संघको सचिवालयमा बुझाउनुपर्ने व्यवस्था गरिएको छ।
संघले तोकिएको समयसीमाभित्र निर्देशन पालना नगर्ने तथा प्राप्त उजुरीमाथिको छानबिनबाट विधानविपरीत कार्य गरेको पुष्टि हुने पदाधिकारी र सदस्यहरूमाथि आवश्यक कारबाही प्रक्रिया अघि बढाउने चेतावनी दिएको छ।
एनआरएनएले त्यस्ता व्यक्तिमाथि संघको विधान र प्रचलित कानुनबमोजिम छानबिन तथा कारबाही गरिने स्पष्ट पारेको छ।
संघको पछिल्लो निर्देशनले गैरआवासीय नेपालीहरूको साझा संस्थाको नेतृत्वमा राजनीतिक दलगत आबद्धताको विषयलाई पुनः चर्चामा ल्याएको छ। अब सम्बन्धित पदाधिकारी तथा सदस्यहरूले सात दिनभित्र निर्देशन पालना गर्छन् वा गर्दैनन् भन्ने विषय चासोको केन्द्र बनेको छ।