1329
Shares
मंसिर १६ –हिजोबाट नेपालमा सुरु भएको बिवादित एसिया प्यासिफिक समिटमा आज मदर मुनको रुपमा क्रिश्चियनहरुले पुज्दै आएकी यूपिएफकी प्रमुख हक जा हानले ३ सय जोडीलाई पवित्र जल छर्केर आर्शिवाद ‘ब्लेसिङ’ दिने कार्यक्रम छ । जहाँ प्रधानमन्त्री ओली दम्पत्तीदेखि लिएर मन्त्री तथा मेयरका दम्पत्ती जोडीहरुलाई निम्तो पठाईएको छ ।
समिटको बाहानामा नेपालमा क्रिश्चियन धर्मको प्रचार गरिरहेको र त्यसमा सरकार पनि सहभागी भएपछि यसको चौतर्फी आलोचना भईरहेको छ । यसबीचमा आलोचना र बिवाद धेरै बढेपछि मदर मुनबाट आर्शिवाद लिन प्रधानमन्त्री ओली र पत्नी राधिका शाक्य भने सहभागी नहुने बताईएको छ ।
प्रधानमन्त्रीको निजीपरराष्ट्र मामला सल्लाहकार राजन भट्टराईले प्रधानमन्त्री दम्पतीले मदर मुनसंग आर्शिवाद लिने कार्यक्रम नरहेको बताएका छन् । उनले भने ‘प्रधानमन्त्रीज्यूले आइतबार साढे ४ बजे गुड गभर्नेन्सको सेसनमा सम्वोधन गर्ने कार्यक्रम छ र ब्लेसिङ लिने कुरा गलत हो’ । उता मदर मुनले प्रधानमन्त्रीलाई ‘गुड गभर्नेन्स अवार्ड’ दिने कार्यक्रम भएका छन् ।
जुन अवार्ड लिन भने प्रधानमन्त्री सरिक हुने बताईएको छ । बुझिए अनुसार आयोजकले सोही क्रममा प्रधानमन्त्रीलाई मदर मुनबाट आर्शिवाद दिने कार्यक्रम पनि राखेको छ। पुरानो सेड्यूलमा साढे ४ बजे प्रधानमन्त्री दम्पतीलगायत पाँच सय जोडीले माताबाट ब्लेसिङ लिने उल्लेख थियो । प्रधानमन्त्री नै सहभागी नहुने भएपछि आयोजक निराश बनेको बुझिएको छ ।
उता निम्ता पाएका कतिपय मेयरहरुले कार्यक्रम क्रिश्चियन कार्यक्रम रहेको बुझेपछि आर्शिवाद लिन नजाने मनस्थिती बनाएका छन् । यसैबीच काठमाडौंका मेयर विद्यासुन्दर शाक्यले पनि आफुलाई निम्तो आएको तर कार्यक्रममा उपस्थित नहुने जनाएका छन् ।
