लियोनल मेसी बने फिफाको वर्ष खेलाडी

काठमाडौं – अर्जेन्टिनी स्टार फुटबलर लियोनल मेसीले बेस्ट फिफा अवार्ड पाएका छन्। यो अवार्डसँगै उनी सन् २०२२ को उत्कृष्ट खेलाडी घोषित भएका छन्। मेसी पेरिस सेन्ट जर्मेन (पीएसजी) का फरवार्ड हुन्। प्रतिस्पर्धामा रहेका फ्रान्सेली फरवार्डद्वय केयलिन एम्बापे र करिम बेन्जेमालाई पछाडि पर्दै मेसीले अवार्ड हात पारेका हुन्।

कतार विश्वकपमा अर्जेन्टिनाका कप्तान रहेका मेसीले उत्कृष्ट खेल प्रदर्शन गर्दै अर्जेन्टिनालाई विश्वकपको उपाधि दिलाएका थिए। उनले सन् २०२१–२०२२ मा आफ्नो देश र क्लबका लागि ४९ खेलमा २७ गोल गरेका थिए। महिलातर्फ बार्सिलोनाका एलेक्सिया पुटेलास वर्षको उत्कृष्ट खेलाडी घोषित भएकी छन्।

मेसीले दोस्रो पटक फिफाको वर्ष खेलाडी अवार्ड जितेका हुन्। मेसीले अवर्ड प्राप्त गर्नु गर्व र उपलब्धि भएको भन्दै साथीहरुकोसमेत यसमा साथ रहेको बताएका छन्।